ఆయనది వశ్యవాక్కు. ఆయన పలికినది జరుగుతుందనడానికి ఎన్నో తార్కాణాలున్నాయి. ఆయనను నమ్మక నష్టపోయినవారున్నారు గాని, నమ్మి చెడినవారు లేరు.
అటువంటి కవియోగి సుబ్రహ్మణ్యస్వామి క్రీ.శ.1802వ సంవత్సరంలో తిరుమలమ్మ-నరసయ్య పుణ్యదంపతులకు ఓబులేశునిపల్లెలోని మాతామహుల ఇంటిలో జన్మించారు. వీరి ధర్మపత్ని వేణమ్మగారు. 1882వ సంవత్సరం ఉత్తరాయణ పుణ్యకాలం పుష్య బహుళ అష్టమినాడు వారు స్వచ్ఛందంగా భౌతికశరీరాన్ని త్యాగం చేశారు. వారు దేహాన్ని విడిచిన ఆ తిథినాడు అప్పటి నుండి ధర్మవరం ప్రాంతంలో ఆరాధనోత్సవాలు జరగడం విశేషంగా చెప్పుకోవాలి. ఆ ఆరాధనోత్సవాలకు జనం భక్తితాత్పర్యాలతో తండోపతండాలుగా హాజరవుతారు.
పలనాడు ప్రజలు ఆ భక్తకవియోగిని సుబ్బయ్య, సుబ్బదాసు, తాతయ్య, సుబ్రహ్మణ్యస్వామి, సుబ్రహ్మణ్యకవి, సుబ్రహ్మణ్యదేశికులు అని గౌరవంగా భక్తి ప్రపత్తులతో వ్యవహరిస్తుంటారు. ఇటీవలికాలంలో కొందరు భక్తులు మాలధారణ చేస్తూ వారిని సుబ్రహ్మణ్యగురుస్వామి అని సంభావిస్తున్నారు. అలాగే ధర్మవరంలో శిల్పశోభితంగా కన్నులకింపుగొలిపే సుబ్రహ్మణ్యకవి మఠాన్ని, విగ్రహాన్ని ప్రతి నిత్యం పలువురు భక్తులు దర్శించి తరిస్తుంటారు. సుబ్రహ్మణ్యకవి మహాకవి. స్వయంకృషితో, గురుకృపతో సంస్కృతాంధ్రాలలో పాండిత్యాన్ని సంపాదించారు. కమ్మని కవిత్వాన్ని పండించారు. అందుకనే ప్రముఖ కవి, సాహితీవేత్త కొండవీటి వేంకటకవి సుబ్రహ్మణ్యకవి గురించి “పుణ్యపురుషుల, లోకోత్తర గుణోత్తరుల జీవిత విశేషాలు ముందువారికి ఆదర్శాలు, మార్గదర్శకాలు. అష్టాక్షరీమంత్ర పారాయణంతో సాయుజ్యమందిన భక్తయోగి సుబ్బదాసుగారు, అష్టశతకాలు రచించడం వారి విశిష్టాద్వైత ప్రవృత్తికి ప్రబల తార్కాణం” అని వాక్రుచ్చారు.
చిరుమామిళ్ళ సుబ్బదాసు కారణంగా వారి వంశం ధన్యం. వారి గ్రామమైన ధర్మవరం ధన్యం. వారి ప్రాంతమైన పలనాడు ధన్యం. ఆ వంశంలో జన్మించిన వారందరు ధన్యజీవులు.